2012/03/29

LAN MERKATUA ERREFORMATZEKO PREMIAZKO NEURRIEN GAINEKO 3/2012 ELDaren INGURUAN

Gaurko egunean, aproposa deritzot, astearteko osoko bilkuran  eztabaidatu eta onartzeko, EAJ-PNV Udal Taldetik, ondorengo mozioa aurkeztu genuen:


1.    Azkoitiko Udalak  3/2012 Errege Lege Dekretu barruan dagoen lan erreformaren kontrako gaitzespena adierazten du, lehiakortasuna irabazteko helburua duela ezartzen duen arren, lan merkatuaren arautzea modifikatzen duelako eta lan baldintzak eta soldatak baliogabetu eta narriatzen dituelako.
2.    Azkoitiko Udalak lan harremanetarako marko autonomoa exijitzen du, Euskadin adostutako eta onartutako kontzertazioa, elkarrizketa soziala eta lan araudi propioa egiteko aukera ahalbidetuko duena.
3.    Azkoitiko Udalak enplegurako politika eraginkorren eskumena osorik transferitzea exijitzen du eta zerga eta tributu politikak ez eragoztea; honek ahalbidetuko du Euskaditik bertatik enplegua sustatzeko behar diren neurriak garatzea, gure berezitasunak kontuan izanik.

2012/03/28

BATERAGUNE AUZIA

Atzoko osoko bilkuran, BATERAGUNE auziaren gaineko mozioak aurkeztu genituen. Jarraian uzten dizuet EAJtik aurkeztu eta  AZKOITIA BAIren aldeko bozkekin babesik handiena lortu zuena:

Datorren martxoaren 28an, Auzitegi Gorenak Bateragune auziaren helegitea aztertuko du Madrilen. Arnaldo Otegi, Rafa Diez, Miren Zabaleta, Arkaitz Rodriguez eta Sonia Jacinto hamar eta zortzi urteko kartzela zigorrera kondenatu zituen Entzutegi Nazionalak ETAkoak izatearen akusaziopean.

Euskal Herrian aldaketa politiko sakonak bizi izan ditugu azken hilabeteetan. Aldaketa politiko sakona izan da ETA erakundeak erabaki eta adierazi izana 2011ko urriaren 20an bere jarduera armatuaren behin betiko amaiera. Halaber, aldaketa funtsezkoa da ezker abertzaleak soilik bide politiko eta demokratikoen alde egiteko erabakia.

Herri hau, giza eskubide guztien onarpenean eta defentsan oinarrituz, demokrazia eta bakea garatuz eta herritarren borondatea oinarritzat hartuz eraiki behar dela, herri honen gehiengoak aspaldi egindako hautua da. Aipatutako bost pertsonak lan politikoa egiteagatik atxilotu zituzten; aldaketa ekarri zuten ezker abertzalera; eta hala ere, kartzelan daude.

Egoera berria sortu da, herri honek merezi zuena eta hainbeste urteetan ukatu zaiona.

Ez Euskal Herritarren gehiengoak, ez eta nazioarteko iritzi publikoak ere, ez du ulertzen ez onartzen, Bateragune auzian kondenatutako bost Euskal Herritar hauek kartzelan izaterik. Ez du onartzen,  sortu den egoera berri honen aurrean, espainiar Estatua urrats positiborik eman gabe gelditzerik.

Hau guztia kontutan izanik, honako erabaki hau hartzen da:

Bateragune auzian Auzitegi Gorenak aztertuko duen helegitearen aurrean, Udal honek Arnaldo Otegi, Rafa Diez, Miren Zabaleta, Arkaitz Rodriguez eta Sonia Jacinto aske uzteko eskaria egiten du.

2012/03/27

TDAH Elkargunean

Guraso ugari hurbildu dira gaurkoan Arreta Gabezia edota Hiperaktibitate Inpultsibitate Trastornoaren (TDAH) inguruko hitzaldira.
Bertan Maite Urkizu psikopedagogak, oso argi azaldu ditu Trastorno honen nondik norakoak, baina benetan ume hauen egoera argi azaltzen duena, berak hitzaldiari sarrera emateko erabili duen ondorengo bideoa da

2012/03/11

BIDEA EGINEZ 3.atala

Azkoitiar guztion etxeetara banatzen ari garen 3. Bidea Eginezen, alde batetik, zaborraren gaia eta bestetik onartu berri diren 2012rako aurrekontuen inguruko gorabeherak azaltzen dizkizuegu  



2012/03/05

MARTXOAREN 8KO ADIERAZPENA, EMAKUMEAREN NAZIOARTEKO EGUNA

Aurreko ostegunean, ez ohiko eta premiazko osoko bilkuran, besteak beste EAJ-PNVtik aurkeztutako ondorengo adierazpena onartu genuen:
1975 urtean Nazio Batuetako Batzar Nagusiak  martxoaren 8 a Emakumeen Nazioarteko Egun izendatu zuen, mugimendu feministek eta elkarteek, indar publiko,  gizarte eragile askok eta askok eta herritarrek orokorrean, gure gizartean gizon eta emakumeen arteko berdintasunean  eginiko lana aitortu nahian.

Hala ere,  gizon eta emakumeen aldetik, eskubideak, boterea eta baliabide eta onurak   lortzeko orduan, aritzeko orduan eta kontrol eraginkorra egiterakoan, desberdintasun garrantzitsuak mantentzen dituen gizarte batean bizi gara. Txirotasun eta gizarte bazterketa jasateko arriskuan dauden pertsonen %82,9a emakumeak dira.  Emakumeek egunean 2 ordu eta 23 minutu gehiago ematen dituzte  egunero etxeko lanetan, haur eta heldu, pertsona gaixo edo  eta menpekotasun bat dutenen zaintzan. Eta  gizon eta emakumeen  urteko soldatan 7.000 eurotako aldea dago.

Beraz, berdintasuna oraindik lortzeke daukagunez bere konplexutasun osoan heldu beharreko zeregina izaten jarraitzen du.
Gizon eta emakumeen egiazko erantzunkidetasunak bakarrik orekatuko ditu benetan emakumeentzako aukerak. Erantzunkidetasuna pribatuan eta enpoderamentua publikoan  dira pentsamendu matxistak baldintzaturik dituen gizarte egiturak baikorki astinduko dituen instrumentuak.

Beharrezkoa da berdintasunean aurrera egin nahi badugu, emakumeek lana izateko, ordainsari berdina lortzeko, gizon eta emakumeen arteko erantzunkidetasuna eta lana eta familia uztartzeko,  ezarritako neurriekin jarraitzea.  Zilegi delako baina baita  eraginkorra delako ere.


Guzti hau kontutan izanik Azkoitiko udalak:

  1. Gizon eta emakumeen arteko egiazko berdintasuna ematen den gizartea   lortzeko bidean, martxoaren 8ª, EMAKUMEAREN EGUNA, ospatzeko antolatzen diren ekintza eta ekimenetan parte hartzera animatzen du euskal gizartea.
  1. Erabakiak hartzeko guneetan parte hartzearen areagotzea  eta giza nahiz ekonomia ongizatea lortzen  lagunduko dien, gizabanako nahiz emakume kolektiboak honen garrantziaz jabetzeko bidean, emakumeen enpoderamendu prozedura hauek bultzatzen jarraitzeko konpromisoa berresten du.
  1. Hala, herri mailako berdintasun politikak egiteko, herritarren eta udal erakundeen arteko zubiak eraikitzeko konpromisoa adierazten du.
  1. Eusko Jaurlaritza eta Emakunderi premiaz eskatzen die, jarrai dezaten emakume eta gizonen arteko erantzunkidetasuna bultzatzen, honela, gizon eta emakumeen lan bizitzaren, gai publikoetan parte hartzearen eta norbanakoaren bizitza pertsonalaren garapenean berdintasuna lortzeko bidean laguntzen baita.
  1. Azkenik, Euskal Gizarte guztiari, gizon eta emakume guztiei eskatzen dio, guztion konpromisoz, gizarte demokratikoago eta justuago bat eraiki dezagula, berdinen gizartea.